Ушанаванне памяці.
Краіна жыве напярэдадні знакавай падеі – 75-годдзя Вялікай Перамогі. У цяперашні складаны час яшчэ большую актуальнасць атрымліваюць такія якасці, як вытрымка, цярпенне, стойкасць, мужнасць і адзінства. Менавіта гэтыя якасці дапамагуць нам у цяжкі час, як і 75 год назад дапамаглі выстаяць перад фашысцкай навалай.
Даўно адгрымела ваенная кананада. Усё менш і менш застаецца жывых сведкаў далёкіх падзей. Але мы павінны помніць, што толькі дзякуючы іх сіле духу, стойкасці мы сёння спакойна ўзіраемся ў мірнае неба, гуляем па скверах і парках, проста жывем.
У знак адзінства, у знак будучыні вучні Доцішскай сярэдняй школы сумесна з працаўнікамі мытні пункту пропуску “Доцішкі” 23 красавіка арганізавалі акцыю-дэсант па навядзенні парадку ля помнікаў салдатам Вялікай Айчыннай войны. Поруч мытнікі і школьнікі, падлеткі і дарослыя. Яны клапоцяцца аб будучым, каб новае пакаленне не пакінула б без увагі сімвалы мужнасці і гераізму на нашай зямлі.
Сімвалічнай стала закладка алеі як даніны памяці загінуўшым. Высаджаны клёны, бярозкі, ліпкі, якія дзесяцігоддзямі будуць спяваць песню ўшанавання памяці герояў.
Гэта патрэбна не мёртвым, гэта патрэбна жывым.
Намеснік дырэктара па вучэбнай
рабоце Пташынская Ганна Антонаўна
