“Настаўнік для Беларусі”
“Больш чым настаўнік”. Менавіта так гавораць пра ўдзельнікаў Праграмы “Настаўнік для Беларусі”. Місія Праграмы: дапамагчы кожнаму дзіцяці раскрыць свой патэнцыял. Для рэалізацыі дадзенай ідэі неабходны крэатыўныя, творчыя, нераўнадушныя педагогі. Менавіта такімі якасцямі валодае настаўніца беларускай мовы і літаратуры Юлія Уладзіславаўна Андруконіс. На працягу чатырох месяцаў настаўніца прайшла ўсе этапы адбору ў кандыдаты Праграмы: індывідуальныя субяседванні, групавы адбор, дэманстрацыя міні-ўрока, двухтыднёвы летні інтэнсіў, сустрэчы з дзецьмі ў летнім лагеры, правядзенне майстар-класаў ў дзіцячым анлайн-лагеры “PROteens”, які, дарэчы, быў арганізаваны настаўнікамі-валанцёрамі Праграмы. Па выніках работы 5 жніўня 2024 года Юлія Уладзіславаўна ўвайшла ў залатую дваццатку Праграмы “Настаўнік для Беларусі” і афіцыйна залічана ў лік лепшых педагогаў нашай краіны. На працягу двух год Юлія Уладзіславаўна будзе атрымліваць куратарскую і метадычную дапамогу, рэалізоўваць уласны праект, накіраваны на развіццё дзяцей і раскрыццё іх патэнцыялу.
